إني راحلة

أقولها لكم وبكل أسف

إني راحلة

........

أيوة هسيب التدوين

صحيح المدونة هتوحشني

وأنتم كمان هتوحشوني أوي

بس

اهئ اهئ

........

استنوا استنوا ما تفرحوش اوي كده

على قلبكوا على قلبكوا

هوا شهر واحد بس

:D

........

اصل أنا بصراحة زهقت

وقلت لازم بقى أجيب امتياز مرة من نفسي

شكلي بقى وحش أوي في المجتمعات الراقية

فقلت لأمي وابي

إني وبعد صراع نفسي فظييييييييع مرييييييييييييع

قررت

قررت

استنوا اما اتشحتف شوية

هه هه اييييييهئ اييييييييهئ

قررت

أبطل نت خااااااااااالص شهر الامتحانات

........

فرجاء

أعينوني

يعني خلال الشهر ده

عايزة الأدعية تنزل ترف عليا كده

اول حاجة

ان ربنا يثبتني وما اطلعش عيلة وارجع في كلامي

وبعد كده بقى

ان ربنا يبارك في وقتي ويعيني على المذاكرة

........

أيتها طلبات

أيتها خدمات

أيتها أخبارات

أيتها اي حاجة في أي حاجة

ايميلي موجود في البروفايل

مكسّلين؟؟؟

أهو

khgehad@yahoo.com

وأنا هبقى أخش أطل عالسريع كده عليكوا

...........

يلاااااااا هيصوا هترتاحوا مني شههههههر بحاااااااااااااااااااااااله

:D

..........

أترككم في رعاية الله وأمنه

وعشان لو قدر ربنا

ورحلت إلى الدار الاخرة

هقولكم على سر صغير

.

.

إني أحبكم في الله

...........

سلام الله عليكم ورحمته تعالى وبركاته

كل عيد وأنتم ...في معنى

السلام عليكم ورحمة الله تعالى وبركاته

البوست ده عالسريع اوي جدا خالص عالاخر موت طحن

لان مفيش وقت من جهة ومن جهة تانية عايزة اقول كذا حاجة

نخووووووووش في المودوع

................

(1)

وصلتني رسالة النهاردة الصبح أول ما صحيت بتقول ايه

(خير الدعاء دعاء يوم عرفه فلا تنسيني من الدعاء)

ممكن نكون كلنا عارفين الكلام ده

بس لما تصحى الصبح عليه بيبقى ليها طعم تاني

وطبعا اللي بعت الرسالة دي هو اللي هياكل معظم الدعاء النهاردة

ايووووووون اللي سبق كل النبأ

وربنا يتقبل

***

(2)

من شوية وانا قاعدة في اخت كلمتني وقالتلي ان خالتها مصابة بسرطان المريء

وطلبت مني الدعاء وابلاغ اللي اقدر عليه

فرجاء لا تنسوها من دعائكم بالشفاء عل الله يتقبل صالحا منا

***

(3)

بفكركم وبفكر نفسي ايوة على وزن اذكركم ونفسي

:D

باتفاقنا مع اختنا صانعة الحرية على دعاء موحد عند الافطار

(اللهم فك اسر المعتقلين وردهم إلى أهلهم سالمين)

***

(4)

مع أنها كان المفروض تكون رقم واحد بس ماااااااشي انا متنازلة

ايه هي بقى

ادعولي عشان اختكم مريييييييييضة

وكل عيد اضحى من وانا في 5 ابتدائي بتعب مش عارفة ليه

:(

نفسي اعيد العيد الكبير مرة وانا سليمة

باين ذنوب السنة كلها بتطلع دلوقتي

خيييييييييييييير

بس ربنا يتقبل

***

(5)

وده مسك الختام بقى

وللي على أساسه اخترت العنوان

يعني زي ما الناس المثقفين بيقولوا

(لب الموضوع)

وزي مالدهماء وعامة الشعب زي حالتنا كده بيقولوا

(الزبدة)

ايه هي؟؟؟؟؟؟؟

تدوينة او لاقول لافتة مضيئة جدا لدرجة انها لعلعت في دماغي

لافتة الاخ الفاضل وضاح

بعنوان

(معنى العيد)

أنا مش هتكلم كتير لاني عايزاكم تقرأوها

لأنه ربنا يكرمه قال فيها كل اللي انا عايزة أقوله

أكرمك الله أخي الفاضل وزادك من فضله وأسبغ عليك نعمه ظاهرة وباطنة

***

(6)

كل سنة وأنتم طيبييييييييييين

ومن ربنا قريبيييييييييييييييين

وفي اللحمة غارقانيييييييييييييييين

وللامتحانات مستعدييييييييييييييين

كل عام وأنتم في معنى

والسلااااااااااااام عليكم ورحمة الله وبركاته

تاج تااااااااااااااااني

وصلني هذا التاج المميز من الفاضل إمام الجيل

و

بسم الله نجيب

.

.

ماهي سورتك في المفضلة في القران ؟
سورة الاخلاص

وسورة مريم .. تخترق آياتها عقلي وقلبي بشكل غير طبيعي
حتى إنني من شدة حبي لها أرددها في ذهابي وإيابي كما أردد الأناشيد
أسأل الله تعالى أن يرزق بنات المسلمين عفاف مريم رضوان الله عليها

ماهى احب ايه اليك الايه التى دائما تتمناها؟
أحب آية إلي .. قل يا عبادي الذين أسرفوا على أنفسهم لا تقنطوا من رحمة الله
و .. وإذا سألك عبادي عني فإني قريب أجيب دعوة الداعِ إذا دعانِ
و .. ألم يأنِ للذين آمنوا أن تخشع قلوبهم لذكر الله وما نزل من الحق
و .. وعجلت إليك رب لترضى
و .. وأشرقت الأرض بنور ربها ووضع الكتاب ...
و .. فناداها من تحتها ألا تحزني قد جعل ربكِ تحتكِ سريا
و .. الأخلاء يومئذ بعضهم لبعض عدو إلا المتقين
ثم كل الآيات التي تتحدث عن التقوى والمتقين

اللهم اجعلنا من المتقين

ما هى اكثر آيه تخاف منها وتدعوا الله ألا تكون من أصحابها؟
كنت أخاف جدا من آية .. (وإن منكم إلا واردها كان على ربك حتما مقضيا)
حتى قرأت في تفسيرها أن المقصود .. ورودها مرورا من فوقها على الصراط فاطمأنت نفسي بعض الشيء
ولكنني مازلت أخافها
أيضا آية .. الذين ضل سعيهم في الحياة الدنيا وهم يحسبون أنهم يحسنون صنعا

ما هى الايه التى تشعر بانها تتحدث عنك؟
هي مش بتتحدث عني بمعنى الكلمة بس بحسها أوي فيا وهي آية
(الذين آمنوا وتطمئن قلوبهم لذكر الله .. ألا بذكر الله تطمئن القلوب)
وحصلت معايا كذا مرة أكون متضايقة وأفتح المصحف بعشوائية عشان اقرأ أي حاجة تهديني وأفتح عليها
يااااااااااه إحساس رائع فعلا
كمان من فترة للتانية بحب أعمل (جلسة الرسائل الربانية) وهي إني أمسك المصحف وأفتح بتلقائية أي صفحة وأحط عيني على أي آية وأتعهد إني أطبقها الفترة الجاية وأعتبرها رسالة من ربنا ليا .

من احب صحابى واحب صحابيه اليك؟
أحب صحابي إلى قلبي .. سيدنا سعد بن معاذ
على فكرة أنا قعدت كتير أوي على ما جاوبت السؤال ده لأني حسيت إن كل واحد فيهم له مميزات تجعله الأقرب إلى قلبي
بس يمكن سيدنا سعد بن معاذ أكثرهم لأنه رجل عاش مسلما 7 أعوام فقط
و غير مجرى حياة قبيلته
واستطاع أن يصل إلى درجة قرب من الله تعالى تؤهله أن يدعو فيجيب الله دعاءه في الحال
ثم يهتز عرش الملك الجبار عند وفاته

يا ترى .. ماذا فعلنا كمسلمين طوال هذه الأعمار المديدة وهل وصلنا معشار ما وصل؟؟؟؟

رضي الله عنه وأرضاه

أما أحب صحابية إلي فهي السيدة فاطمة رضي الله عنها وأرضاها

من أحب نبي إليك بعد الحبيب صلى الله عليه وسلم؟
سيدنا داوود عليه السلام .. أحبه حبا لا يوصف وأتمنى من كل قلبي أن أرافقه في الجنة وأتمتع برقة قلبه ونداوة صوته

إذا كنت على عهد النبي صلى الله عليه وسلم فمن كنت تحب أن تكون ولماذا؟
السيدة فاطمة بكل تأكيد
ابنة الحبيب وسيدة نساء أهل الجنة



ما هو منتداك وموقعك المفضل؟
منتديات .. الملتقى و يلا شباب
موقع .. إسلام أون لاين
ومواقع طب الأسنان >> كل واحد بيحن لأصله بقى

ما هى احب الاسماء التى تحب ان تنادى بها؟
اسم الدلع بتاعي

من هو كاتبك المفضل؟
مصطفى صادق الرافعي بكل تأكيييييييييييييييييييييييييييد

مدون له عليك فضل او استفدت منه؟
الأخ الفاضل ... مزاجات
حقا أدعو الله أن يجزيه عني خيرا ويجعل علمه الذي نفعني به في ميزان حسناته

من هو قارىء القران المفضل اليك؟
الشيخ المنشاوي رحمة الله عليه

من هو منشدك المفضل؟
يااااااااااه كتييييييييييير
أسامة الصافي .. مشاري العرادة .. سامي يوسف .. موسى مصطفى .. مشاري راشد
إبراهيم السعيد .. أحمد الهاجري .. أحمد بو خاطر .. وغيرهم

ما هو نشيدك المفضل؟
على حسب كل ظرف وحالة نفسية لها نشيدها المفضل
بس أكثرهم .. يا نجوما
يا دعوتي سيري
أفديك بروحي يا كتابي
فرشي التراب
مناجاة سامي يوسف
ينادي فؤادي
لا تحزن
مناجاة العاشقين

وكفاية كده

اذا كان لك دعوه واحده تدعوها وستتحقق فبماذا ستدعوا؟؟
أن يُختم لي بالشهادة في سبيل الله

من هو الداعيه المفضل اليك او شيخك المفضل؟؟؟؟
الأفاضل .. عائض القرني .. محمد العوضي .. خالد أبو شادي .. مصطفى حسني .. عمرو خالد

ما هى اكثر عباده تشعر انها تجعلك قريب جدا من الله؟
الصيام والقيام والذكر ثلاثتهم لهم على نفسي وروحي عظيم الأثر

من احب افراد عائلتك اليك؟؟
لو العائلة بعيدا عن الأسرة .. زوجة عمي الأصغر
أما الأسرة فبحبهم كلهم

ما هو املك فى الحياه؟؟
أملي في الحياة أن يرزقني الله الإخلاص ويحفظني من الرياء
وأن يستخدمني وألا يستبدلني حتى آخر نفس

أمرر التاج ده

لـ

أنا مصري

صاحب المضيفة

just amuslim

ظل قلم

أوراق الورد

!!فاكرين فلسطين ؟

فاكرين فلسطين

وللا الهمّ لاهينا

فاكرين الانتفاضة

وللا التراب

منفوض علينا

تاه الشباب

وسط العذاب

(وشال الـ (نا

من كلمة مآسينا

فاكرين فلسطين

وللا الهمّ لاهينا

***

يا حق ضايع

في كل البلاد

من كتر الشتات

زاغت عنينا

وتاه انشراحنا

فـ جرح أرواحنا

والهمّ اتشال

واتحط علينا

فاكرين فلسطين

وللا الهمّ لاهينا

***

بتبكي العيون

تزيد الشجون

تقيد الحماسة

وأكل العيش

من تاني يطْفينا

فاكرين فلسطين

وللا الهم لاهينا

***

نمد الأيادي

نصرخ بلادي

أهلي وحبايبي

قلبي وفؤادي

نحس بهمومهم

نبكي بدموعهم

شوية ونرجع

تغفّل عنينا

فاكرين فلسطين

وللا الهم لاهينا

***

ذنوبنا سلاح

متسلط عليهم

وكل الجراح

جنتها إدينا

شايفين فلسطين؟؟

وللا الهمّ عامينا

***

غفلة وضياع

يقولي بتفاهة

كفاية صداع

كفاية اللي فينا

***

تعالى أقولك

مين اللي باع

وساب الديابة

في قلب المتاع

تعالى أقولك

مين اللي سلم

وخلّا الشهيد

في القبر يتألّم

تعالى أقولك

مين اللي خان

ودارى حقيقته

مابين الكلام

تعالى أقولك

إني وإنك

سبب الهموم

بضعف الايمان

والجبن اللي مالي

قلوبنا وعنينا

فاكرين فلسطين

وللا الهمّ لاهينا

***

هتقولي بدعي

هقول مش كفاية

طب هاتي الحلول

إيدك معايا

نبدأ حياتنا

في طريق الهداية

نصحح غلطنا

نقول لأ كفاية

نقاطع عدانا

واخواتنا في قوتنا

نقاسمهم معانا

يمكن قريب

أكييييد قريب

الناس تفوق

ونعلى لفوق

وتبقى فلسطين

صاحية في عنينا

ونبقى فاكرين

والهمّ منزاح

وما عادش لاهينا

....

لأخذ العلم

هذه أول تجاربي في هذا اللون

نسألكم النقد البناء

من نجمة لأبيها

سطرت كليمات منذ عدة أشهر



لا يتجاوزن الأسطر .. لكن لهن عظيم المعنى في قلبي



وددت مرات عديدة أن أضعها هنا



ولا أدري ماذا كان يعوقني



ربما لأن قدره أكبر عندي من هذه الكلمات فاستحي منه

؟؟



ربما



..



ياخذني إليه حنين دائم



سطرته في آخر هذياني السابق



..



ثم



قرأت تدوينة دكتور حر الاخيرة
فأثرت في نفسي شديد الاثر



..



قررت حينها أن أضع متواضع ما سطرت من أشهر



علها توصل إليه بعض مافي قلبي



..



إليكم



وإليك

اعتراف بالفضل



من نجمة لأبيها





أبي

اسمك لي عز ومفخرة
والحمد لله أنك كنت الأبا
أبي والحب من مهده نبض
إليك بكل الشوق قد حبا
أبي سمو فكرك يأسرني
وحنان روحك قلبي قد سبا
أبتاه أنت لي نبع التماع
وضوئي منك التألق اجتبى

فجزيت خيرا يا أبا النجمة