الأحد، فبراير 15، 2009

خير اللهم اجعله خير


أولا


سلام عليكم جميعا


ثانيا


جزيتم خيرا جميعا بردو

على تهانيكم الرقيقة اللي وصلتني الفترة اللي فاتت

سواء هنا في البلوج او بالحضور او عالموبايل

بجد جزيتم خيرا

ونردهالكم في الافراح ان شاء الله


ثالثا


انا بقالي فترة في دماغي كام موضوع

وربنا يخلي الكلية

ودماغي المصدي معاها

مش عارفة ابدأ بإيه


المهم

إنه الطبييييييييعيي يعني الطبيعي

إن واحدة في حالتي دي

المفروض تقعدلها شهرين تلاتة تكتب عن الحب وسيرة الحب

والخطوبة والجواز

وقالي وقلتله ومش عارف ايه

بس بما إني بمتحن لسه

ونفسي مسدودة

فمش عتكلم في الموضوع دا خالص دلوقتي


رابعا بقى

انا بعتذر عن الكتابة بالعامية

بس لأني بقالي كتير معتزلة ولياقتي اللغوية ضاربة حبتين اليومين دول



خامسا بقى


بس بقى دي غير بتاعة رابعا


إني كنت قاعدة خير اللهم اجعله خير في أمان الله

سمعت حوار لذيذ كدا شدني

فقلت أسمعهلكم يمكن يشدكم انتوا كمان


بيبو : ياااه هنرجع للمدرسة تاني يادي الغممم

شوشو : انا مستغربة منكم والله

لسه هاجر كانت بتقولي انا زعلانة ان المدرسة هتبدأ بكرة وانا بقولها اني مبسوطة

بيبو : مبسوطة على ايه جتك خيبة


أنا بيني وبين نفسي : اه صحيح جتك خيبة!!


فاصل صمت قصير


شوشو : انتي خدتي كراسات قد ايه لبكرة؟؟

بيبو : اتنين من كل نوع بس عشان الاساتذة الخنيقة اللي بتبدأ من أول يوم

شوشو : اه والله حاجة تقرف لازم من اول حصة واول ثانية يبدأوا


أنا بيني وبين نفسي : يا سلام مش كنتي مبسوطة من شوية!!

وبعدين انتوا رايحين المدرسة عشان تعملوا ايه يعني؟!!


فاصل صمت قصير


بيبو : ياااخراااااااااااااشي هنرجع للأستاذة (فلانة) تاااااااااااني

شوشو : اه والله انا مش عارفة انتوا مستحملينها ازاي ربنا يكون في عونكو

بيبو : دا حاجة والله مش عارفة الست دي مالها هي بتعمل فينا كدا ليه

شوشو : وانا اليل ادبست فيها في جلسة القران


هنا تدخلت أنا : جلسة قران ايه يا شوشو دي


شوشو : دي جلسة قران المدرسة عاملاها كل يوم اتنين في الفسحة اللي عايز يشترك فيها بيروح ونتعلم تجويد وحفظ وكدا غير بتاع المدرسة اصلا

أنا: ماشاء الله طب كويس والله

بيبو .. مواصلة كأني مكنتش هنا من شوية : ولا استاذة (فلانة)


أنا .. وفي نفسي (لابد من التدخل) : إباااااااااء خفي يا ماما مش من كتر حسناتك بتوزعيهم عالمدرسات


شوشو وكأني مكنتش هان بردو : ايه !!!! دي استاذة عسل جدددا

اكتر استاذة فصلنا بيحبها اصلا

عارفة بتشتم كدا شتايم من القديمة بتاعة زمان


أنا انفجرت من الضحك وسألت ببراءة : شتايم زمان؟؟ هو الشتايم كمان بتتجدد؟؟؟


شوشو : اه طبعا يا بنتي

يعني الاستاذة دي بتشتم من اللي هي غبية ... حمارة ...هبلة .. كدا الحاجات القديييمة دي

أنا : لا والله ؟؟ وايه الجديد بقى ؟؟

شوشو : لا بقى في جزمة .. كلبة .. وكدا حاجات جامدة بقى ... لا يابنتي دا في حاجات جديدة خااااالص

وضحكت !!!

أنا : وانتي بقى بتحبيها عشان بتشتم شتايم قديمة والباقي بيشتم شتايم جديدة ؟؟

شوشو : لا طبعا اصلا هي الاستاذة الوحيدة اللي بتشتمنا

بس عسولة بنحبها


أنا بيني وبين نفسي : ربنا يحلي نفسكو ياختي كمان وكمان


بيبو: شوشو انتي مشتركة في البرلمان الصغير

شوشو : كنت مشتركة وطلعت .. رخم

بيبو : رخم فعلا مش كدا

شوشو : انا رحت اشتكرت بردو في المكتبة بس مش عارفة بحس ان استاذة تهاني بتتخنق مني

أنا : استاذة تهاني بتاعة المكتبة !! دي عسل يا شوشو ايام ما كنت في المدرسة كنت بحبها اوي

شوشو : مانا عارفة ماهي عسل وكل حاجة

بس مش عارفة مرة رحت قلتلها جهاد بتسلم عليكي قامت قالتلي ابقي سلميلي عليها وسكتت كدا مخدتش وادت معايا في الكلام

أنا ضحكت وقلت : وانتي عايزاها تاخد وتدي معاكي في الكلام ليه يا ست شوشو كنتي من بقيت الاستاف بتاع المدرسة ولا ايه

شوشو: لا بس يعني انا رايحة اقولها انك بتسلمي عليها تديني انا وش بردو


دخلت بيبو في الحوار : انا مشتركتش من اول ما جيت المدرسة غير مع مستر احمد في جماعة الكلمة الطيبة

وسابنا ومشي

شوشو ضحكت اويييييي : على وشك يا نحس

بيبو : هههههههه لا والله اصل مكنش ينفع اشترك في غيرها اصل اول ماجيت قالولي انه مينفعش من اول سنة اشترك

وضحكككت اووي وبعدين كملت :: لازم اطبق سنتين الاول في خدمة المدرسة بعدين يسمحولي بالاشتراك

السنتين دول بقى اكون انا خلصت 3 اعدادي وبقيت برا المدرسة فاشترك براحتي بقى هههههههههه


ملقتش حاجة اعملها غير اني اضحك بردو


اخيرا خلصوا تحضير جداولهم وترتيب هدومهم

واخيرا هينااامووو


بيبو رفعت حاجب ونزلت حاجب وهي قدام المراية : شوشو بفكر مروحش بكرة

شوشو : لا بجد بجد .. تبقى ندلة

بيبو : مانا عارفة هههههههههههه

ياسمين ممكن تموتني اصلا

انا كنت بقنعها تروح

لا هروح هروح

يالا سلام انا هنام


شوشوتسلقت سلم السرير بتاعها وككل ليلة : لا اله الا الله .. مي تو


أنا : محمد رسول الله ... مي تو


سلام


****

على جنب :-

1- شوشو في 6 ابتدائي

2- بيبو في 3 اعدادي

3- المفروووض انهم في مدرسة اسلامية

4- المفرووووض اني كنت في نفس المدرسة دي زمان

بس سبحان الله معرفش ايه اللي حصل

5- الكلمة من المعلم بتفرق من الطالب فوق ما يتخيل

6- مفيش احسن من تقدير الطفل وعقليته

7- الجيل دا جيل مهبب

8- احنا مكناش أطفال والله دا احنا كنا كتاكيت

9- نفسي المدرس يرجع له هيبة زي زمان

10- كل حاجة مبقتش حلوة زي زمان .. ليه

11- النشاط المدرسي فعلا بيكون جزء كبير من شخصية الطالب

>> شايفين الشخصيات

12- ربنا يستر من الللي جاي .. بس انا متفاءلة ... :)

13 - حسبي الله ونعم الوكيل ... دا ميمنعش اني لسه متفاءلة .. D:

14- مي تو لفظة اخترعتها اسرتنا الكريمة عشان كنا كل ما نيجي ننام

واحد يقوم قايل متنسوش تقولو الدعاء والشهادتين وانتوا على جنبكو اليمين واللي زعلان مني يسامحني

فيقوم كل واحد يرد عليه وانا كمان وانا كمان وانا كمان

فاختصرنا الليلة دي كلها بـ مي تو

D:


خُلل عارفة

هههههههههههههه


يالا اسيبكم انا بقى واقوم انام عشان نازلة بدري بكرة

لا اله الا الله .. مي تو

D: