!!! عصفور في المشرحة

:Dمادة التشريح من أثقل المواد على قلبي وعلى قلب كل طالب سوي
هي كمادة علمية ممتعة جدا

ويكفيني فيها أنني أقضي وقت المحاضرة أتأمل بشغف عظمة خلق الله عز وجل وأسبح

لكن عندما يتعلق الأمر بالاختبار... فلابد وأن تصبح أثقل مادة .
جاء الامتحان النظري .. لله الحمد من قبل ومن بعد جاوبت بشكل وإن لم يكن ممتازا فإنه جيد

وعزائي في ذلك أني بذلت في هذه المادة مجهودا كبيرا وما شاء الله كان ولابد أن يكون

لا بأس بكل ذلك ، المشكلة كلها تكمن في الاختبار الشفوي

اتصلت : أنا – السلام عليكم
- وعليكم السلام
- معلش لما رنيتي عليا كنت في الامتحان الشفوي طمنيني عملتي ايه في النظري
- الحمد لله سهل الله لي المهم انتي عملتي ايه
- الحمد لله كان لذيذ
- الله يلذذلك دنيتك كمان وكمان ، ادعيلي بقى عشان امتحاني الشفوي بكرة وأول مرة امتحن شفوي في حياتي
- يا حبيبتي ! ربنا معاكي يارب ويطلق لسانك
- جزاكم الله خيرا يا حبيبتي واياكي ان شاء الله
- ماشي يا جميل مش عايزة حاجة
- جزيتِ الجنة
- السلام عليكم <<<<<< كالعادة قولناها مع بعض وردينا مع بعض

رحت الكلية ... شفتي الجدول ؟!
أنا : لا هو فين
هناك جنب باب المشرحة الكبير
طيب شكرا
من رقم ... لرقم ... الساعة ... قاعة التشريح رقم ...
من رقم ... لرقم ... الساعة ... قاعة التشريح رقم ...
أيون أيون أيووووون أنا أهو
من رقم 59 لرقم 69 الساعة 11 قاعة تشريح رقم (1) يا مسهل

كويس الساعة لسه 9 ونص هلحق أراجع على العضم كله إن شاء الله

يارب يارب أتسئل في الـ (skull)

اتسئلش في الـ (head & neck contets)

ولو اتسألت في العلاقات اللي بينهم أتسئل في الحاجات السهلة يااااااااااارب

نص ساعة و .... يارب دكتورة مايسة هي اللي تسالني عشان هي عارفاني وهطمن لما أشوفها
نص ساعة كمان و..... ايدي بدأت تترعش وبطني بتوجعني .. يا عيال أنا مش مراجعة معاكو مش قادرة
أعصابي باظت ونسيت كل حاجة اللي يحصل يحصل ربنا يستر بقى
ربع ساعة كمان و...... المجموعة الأولى بتاعة الساعة 10 خرجوا
ها يا أميرة عملتي ايه الحمد لله كويس
وانتي يا الهام .. دكتور مكرم ده ممتاز اسئلته سهلة
ربنا يستر على اللي هيدخل للدكتورة دعاء بتعصر العيال جوا
بجد ؟ ليه كده
أصلها بتسألهم في الـ (skull)

<<<<< يا حوستي وانا اللي كنت عايزة اتسئل فيها >> متفوقة بقى

عشر دقايق كمان و...... عمو البواب قام مزعق فينا .. يلا المجموعة اللي بعدهم يدخلوا
ياعم مش ناقصة خضة الله يكرمك

وفي المشرحة .. أصل إلى أعلى درجات غض البصر حيث النظر ... تحت رجلي وبس
يمين جثث وشمال جثث وانا بترعب وريحة الفورمالين ملعلعة وداخلة في نغاشيشي وشوية وبطني هتقلب
من الاخر حاسة اني ميتة قبل كده مرة ... ربنا يستر

فين قاعة (1) يا رجالة
أهي ..
الله أكبرررر الدكتورة العصبية !!!!

نهانا فن >>>الترجمة نهارنا فل

يا خراشي كمان لسه نص المجموعة الأولى بتوعها ما خرجوش !!!!!
يا صلاة النبي يا صلاة النبي
شكلي أنا اللي هتشرح النهاردة
خير خير خير

يلا ما دام مطولين .. يبقى (دقائق الانتظار نملأها بالاستغفار) عشان ربنا يكرم وينزل علينا الاجابات مدرارا ياااااااااااارب

أنا داخلة والواد ده بيتسئل ولسه قاعد ده كله .. بقالها ربع ساعة بتعذب فيه
ده حتى الرسول عليه الصلاة والسلام قال (..وإذا ذبحتم فاحسنوا الذبحة وليحد أحدكم شفرته وليرح ذبيحته)
دي سالته في المنهج كله .. الرحمة يا عالم
بصراحة أنا لو عملت معايا كده هقولها انا لو منك (أسقطتني) في المادة كلها شفوي ونظري واريح نفسي
>>> الواحد ينسحب بكرامته أحسن

هييييييه الصبر يارب
لا بصوا انا اعصابي باظت ولازم اشغل نفسي في حاجة
بصيت في السقف لقيت المكان اللي بتدخل فيه اللمبة واقف عليه عصفورة

خرجت من الشباك ورجعت معاها شوية حاجات يفترض إنها قش
ودخلت جوا الحتة دي
عصفورة تانية خرجت ودي فضلت مستنياها الاولى رجعت ودي راحت وهكذا
خلوهم رايحين جايين لغاية لما اتحولت >>> اصلها ناقصة
بس كنت مبسوطة أوي ولأول مرة منذ ساعات مبتسمة
معاني كتير تدفقت إلى بالي ساعتها <<< واخدين بالكو من تدفقت دي
التعاون ، الرحمة ، الحب ، اتقان العمل ، الرزق ، اللمبات اللي مش نضيفة ، تقفيل الصنايعية المتكروت
يعني معاني من دي


>>> عودة الى الواقع
الله اكبر لولولولولوليييييي، هتبدا في مجموعتنا اهي هاااااااااااااااانت كلها شكة (خازوق) وأرتاح الراحة الأبدية
ايه ده الدكتورة مايسة أهي ، راحت .. جت .. دخلت .. كلمت الدكتورة .. هتبصلي أهي هتبص
خرجت
ايه ياستي بتحنسيني يعني ؟؟1 مش عايزاكي تساليني بقى هه
شوية ورجعت تاني ، بصتلي .. خدت بالها لولولولوليييييييي خدت بالها خدت بالها
سالتني انتي رقم كام >>> وأنا بكل مسكنة الدنيا 68 يا دكتور
طيب يا حبيبتي

بصت للدكتورة وهمهمت شوية وكركروا سوا وبعدين خرجت
أول ما قالت يا حبيبتي كل العيال بصولي
اووبااااااااا ...... الحقد هيشتغل اهو:D
أعصابي باظت أكتر مش عارفة ليه ، رجلي بدأت تتهز ومسكت دماغي

والدكتورة بدات تبصلي ..الاول كانت نظرات متفحصة .. وبعدين تحولت إلى نظرات شفقة
خير خير هانت الحمد لله تغريد بتتسئل وانا اللي بعدها
مش فاضل الا انا وبعدي الدكتور حسين والمشرحة فاضية وهتستفرد بيا ربنا يستر : S
تغريد قامت .. تليفون الدكتورة رن
- أهللللللللا أيوة يا (أرأر) عملتي إيه يا عسل
>> شاورتلي أروحلها
- ماشي يا حبيبتي كويس شاطرة
يارب يا (أرأر) وشك يطلع حلو عليا
- لا بصي خلي باسم نايم لحد ما ارجع ماشي يلا سلام
بصتلي.... أن أن آآآآآآآآآآآن
ماشي يا جهاد قوليلي بقى ايه ده .....
(ماهذا أتسخرين مني يا امرأة !!) ايه السؤال السهل ده

<<< مانتي كنتي بتموتي دلوقتي
المهم قعدت تسالني اسئلة والحمد لله ربنا يطلق لساني واجاوب
وكل ما اجاوب اترعش اكتر !!!!! وهي شوية وهطبطب عليا
بالراحة يا حبيبتي على مهلك ، برافو عليكي ، جميل أوي
طيب يا جهاد خلاص اتفضلي
!!!!!!!!!!!!!!!! إيه ده !!!!!!!!!!!!!!
خلاص كده
ماحسيتش بالخازوق ..أأأأأأأصدي بالحنقة .. يوووووووووه أصدي بالأسئلة

وطلعت من المقبرة
تقريبا ما كانش في القاعات كلها الا انا والدكتورة وحسين فعلا

لقيت الشعب مستنيني بره
هااااااا عملتي ايه
ابتسمت ابتسامة النجاة وكشفت راسي في ساعة ضهرية وقمت مادة دراعاتي
يااااااااارب يا منال انتي ومايسة ربنا يفقكوا ويرزقكم بجثث كل حاجة فيها واضحة

والعيال ما يتعبكوش في الشرح ورئيس القسم ما يغلسش عليكو في التصحيح ياااااااااااااااااارب

هههههههههههههههههه يبقى جاوبتي كويس
الحمـــــــــــــــد لله