ملتقى الفتيات الخامس .. 2 .. أنا في الملتقى

بسم الله الرحمن الرحيم والصلاة والسلام على سيد الخلق وعلى آله وصحبه أجمعين

وسلامو عليكو جميعا

أنا قررت النهاردة يعني بجد بقى خلاص إني أكمل موضوع الملتقى

اللي مش عارف هكمل على ايه يدووووووس هنا
بس قبل ما أكمل عايزة أعتذر الأول عن التأخر دا كله لأنه بجد كان غصب عني
والموضوع محتاج تركيز يمكن أكتر من التقرير اللي فات

طب ليه؟
لأن التقرير اللي فات كنت بعرض عرض مجرد للأحداث والفعاليات وبس
لكن المرة دي هيكون الكلام (عني أنا في الملتقى) ايه اللي اتعلمته وايه اللي استفدته .. ايه عجبني وايه معجبنيش .. مشاعر احاسيس ..كلللللللللل حاجة
فطبعا المطلوب إني أسترجع من أوووووووول يوم السفر أو حتى من قبله لغااااااااااية يوم ما رجعت
بكل التفاصيل الشعورية واللاشعورية والاهبلال اللامغناطيسي في البوتقة المحيطة بمش عارف ايه
المهم يعني

إني هكمل
D:

...................
طيب نصلي عالنبي
عليه الصلاة والسلام
كان يا مكان في سالف الشهر وفي نفس المكان مش نفسه اوي يعني .. كنت في الصالون الصراحة دلوقتي في الصالة
المهم كنت قاعدة قال ايه خير اللهم اجعله خير بذاكر
الساعة 11 بالليل لقيت الست شوشو ربنا يكرمها باعتالي رسالة بتقولي (جهاد خشي عالنت لو ينفع عايزاكي ضروري) اووووباااااااا عالنت الساعة 11 باليل وهي عارفة اني مقاطعاه ايام المذاكرة وضروري ورسالة قطم كدا .. انا اترعبت .. قمت.. ماما ممكن ادخل عالنت اشوف شوشو عايزة ايه ؟
بما ان ماما اترعبت معايا فما ناقشتنيش كتير قالتلي ماشي
دخلت .. ايوة خير السلام عليكم الاول في ايه ؟؟؟
بالراحة يابنتي مفيش حاجة والله كل الموضوع ان في معسكر كذا كذا كذا ....... الخ
المهم بالطريقة الشيك دي عرفت الموضوع
قلت نستاذن طبعا من الحج والحاجة قبل ما نرد
الحمد لله بردو عشان نجيب من الاخر ربنا يسر وامي وابي وافقوا بالعكس كانوا مرحبين جدا بالفكرة
>>>> عشان ما تقولوش اني ناسياكو بس اهو
.................
مرت الايام سراعا وجاء موعد الاقلاع قصدي شد الرحال الى كايرو مدينة مصر (نصر) عشان نركب البودوبيس من هناك
رتبت حالاتي واخدت احتياجاتي ونزلت وقفت على راس الشارع عشان اخو شوشو ربنا يكرمه هو اللي كان هيوصلنا لغاية مكان التجمع
الكلام ده الساعة 7 الصبح والمفروض نبقى هناك الساعة 8 ركزوا في الحتة دي عشان هتعمل معانا شغل جامد اوي قدام
المهم استنيت وجم واتكلمنا كلمتين على التاخير بس في الاخر اتكلنا على الله
كانت رحلة لذيذة الصراحة
الطريق كان فاااااااااااااااااااااااااااااااااضي (يوم الاحد صباحا) ولا كان فيه زحمة خالص وكوبري قليوب ولا كان عليه ولا عربية ولا سمعنا زمامير خرمت ودانا ولا حاجة
المهم طول الطريق وعمنا الحاج يذل فينا (ماهو اصلا بنياتكم ترزقون شايفين الطريق عامل ازاي) .. ( اصلا انتوا هتروحو تتبهدلوا هناك وهتلاقوا كل البنات احسن منكم ) .. (اصلا اصلا اصلا .. وشوية بتاع وكلام نعناع وهئ ومئ وطبلة ورق) بس طبعا احنا ما سكتناش .. احنا اتخرسنا ماهو هو اللي بيوصلنا بقى
بس الحمد لله رغم ان الطريق كان سيء والنيات مكنتش صافية الا اننا نحب نوجه شكر خاص جدا لاسرة شوشو الكريمة على التوصيلة الحلوة دي بجد والله كانت لذيذة حتى التهزيئ كان لذيذ وله طعم بردو
المهم وصلنا والناس كانو لسه بيتقسموا في الباصات يعني ماخرناهمش ولا حاجة
وطلعت شوشو وألوء مع بعض في باص وانا لوحدي في الباص التاني
:(

طبعا بما اني ما بيهمنيش الكلام ده قلت لازم نطلع من الحكاية دي فايدة
يعني هقعد مع بنات معرفهمش من الاول ففرصة اكتر اني احتك بيهم وشوية كلام من بتاع التصبير ده
الحمد لله اتعرفت على البنوتة اللي جنبي واديتني قراقيش بالعجوة ومارضيتش تاخد مني بوريو المهم يعني انسجمت خالص وشوية وقمت وقفت في نص الباص وغنيت نشيد لا تحزن والعيال هاصت اناشيد بقى وايه
كان جو مية مية وانسجمنا بسرعة اوي

كمان كان في فقرة جميلة عملناها وهي ان واحدة من كل بلد تقوم تكلمنا عن بلدها شوية .. طبعا كانت فكرة جميلة جدا وعرفتنا معلومات كتير بطريقة خفيفة والبنات كلهم كان دمهم زي العسل

وصلنا ولله الحمد
فعلا محسيناش بالوقت خالص
وقفت الباصات ونزلنا ونزلّنا شنطنا ووزعوا على كل واحدة الـid بتاعها وبدأوا يقسمونا مجموعات ويعينوا على كل مجموعة مشرفة عشان تبقى هي الوصلة بينا وبين ادارة الملتقى
كان كل مجموعة 10 بنات
احب اعرفكم بمجموعتي
1- جهاد خليفة >> أنا جهاد خالد
بنوتة عسولة اوي وصغيرة اوي وبصراحة كانت صدفة لذيذة انها تبقى في مجموعتي وعالسرير اللي جنبي كمان خفت نعمل قفلة صراحة
بس روحها كانت طفولية اوي فاتفقت معاها وقلتلها بصي من الاول كدا هعاملك زي شروق اختي (5 ابتدائي)
2- عائشة
3- فرحية
عائشة وفرحية دول كانوا صوماليات وجه حظهم في توزيع الغرف انهم يبقوا بعيد عننا فما عرفتش احتك بيهم اوي
4- تسنيم
5- يمنى
6- داليا
دول كانو في الاوضة اللي جنبنا علطول مصريات هما
تسنيم دي اول ما شفها قلتلها انتي اخرك معايا 3 اعدادي
بس حبيبتها اوي اوي اوي كنت حاسة فيها بالحماسة والغيرة على الدين ما اتكلمناش كتير اوي في مواضيع كبيرة بس اللي كنا بنتكلم فيه كان بيعرفني حاجات حلوة كتير
ويمنى بقى حتة سكرة للوهلة الاولى تفتكروها بت دحاحة من بتوع المذاكرة والكتب والنظام ده حتى كنا عايزين نلبسها الدور ده في اسكتش مرة في السمر بس طلعت بت دماغ عالية اوي ودمها شربااااااااات وهتكلم عنها تاني قدام شوية
دودي بقى اللي هي داليا كانت مشرفة المجموعة بنت رقيقة وهادية اوي وذوووووووق اوي اوي اوي وبصراحة نفسي اقولها من كللل قلبي (اني احبك في الله)
7- سكمة واتي أو عشان تعرفوا تقراوها sukma wati
اندونيسية بت شقية اوي كانت معايا في الاوضة وقعدت اخر يوم تلبسني الخمار الاندونيسي بتاعهم ده وتقولي شكلك كدا حلو ياخراشي يا جدعان ده انا اتلعب فيا لعب يلا الحمد لله
8- فرح ودي كمان اندونيسية منظمة اوي ونضيفة زيادة عن اللزوم كانت عشان تدخل تتوضا تبات في الحمام وانا اتذل جنبها يابنتي يلا هتاخر على الصلاة يابنتي يلا هتاخر عالفطار لدرجة مرة المغرب قعدت خلصت الاذكااااااااار على ما طلعت من الحمام
ورغم انها كانت هادية بس كانت بتتفاعل معانا كويس
9- نور ليلي nor laily اندونيسية دي كمان دي بقى مكنتش بشوفها غير بالصدفة كان نفسي اقولها يابنتي نفسي اشوفك قاعدة ولا نايمة عندنا في الاوضة.

رقم 10 بقى وسسسسسسسسسسع للباشا الكبير >>> أنا
D:
...................
زي ما قلت في التقرير اللي فات اليوم الاول كله راح في التسكين والغدا والراحة ومكنش فيه الا كلمة ترحيبية من الدكتور حمدي بس فتحت نفسنا كتييييييييييييييييييير الكلمة دي خصوصا لما اتكلم عن مواضيع الملتقيات اللي فاتت

.....
اول يوم ده رغم انه كان مرهق
بس كان ممتع اوي بالنسبة ليا
مكان جديد وناس جديدة واسلوب حياة جديد كان حدث زي ما بيقولو غيييييييييييييييييييييييييير
لما نزلت للغدا وشفتنا كلنا قاعدين على التربيزات بناكل وكلنا بنتكلم ونسلم على بعض ودي بتاكل باديها ودي بتاكل بالشوكة ودي عاجبها دا ودي طعمه معجبهاش ودي بتضحك ودي بتتكلم يااااااااااااااااااااااااااااااااااه
(وجعلناكم شعوبا وقبائل لتعارفوا)
(ومن اياته خلق السموات والأرض واختلاف السنتكم والوانكم)
( اجتمعا عليه وتفرقا عليه)
التعايش .. المودة .. الحب .. الانسانية .... الاسلااااااااااااااام
معاني كتييييييييير كانت بتدور في ذهني وانا قاعدة أتأمل المشهد ده .. حمدت ربنا كتير كتير كتيييييييير اوي
على نعمة الاسلام ونعمة اللسان العربي ونعمة الحب في الله ونعمة تاليف الارواح والقلوب .. نعم لا تعد ولا تحصى استشعرتها هناك
ولما حضرت المحاضرة بتاعة دكتور حمدي .. كنت عايزة اطلع اقول انا هطيييييييير من الفرحة يا ناس انا متفائلة جددوا نياتكم لاني حسيت من كلامه ومن اللي انا شايفاه قدامي اد ايه احنا هنستفيد
لما اتوزع علينا ورق البرنامج كان مكتوب من ضمن المحاضرين .. دكتور صفوت حجازي والفنانة أمية جحا لكن يا فرحة ما تمت الدكتور حمدي قال معلش هما بيعتذروا انهم مقدروش يجيوا لعدة اسباب ومش عارف ايه المهم كان في كذا ضيف اعتذر عن الحضور فقلنا خيييييييييير قدر الله وماشاء فعل
بعد كلمة الدكتور حمدي تم تقسيم مشرفات للجان تانية بقى غير مشرفات المجموعات يعني اللجنة الثقافية الصحية التغذية الرياضية الفنية كل حاجة
كانت مشرفة الملتقى دكتورة نرمين تقول اسم اللجنة واللي عنده المقدرة للاشتراك فيها يتقدم
كل البنات كانوا عايزني اشترك في اللجنة الفنية عشان الانشاد وكدا بس انا قلت كدا كدا ان شاء الله هشترك في فقرات السمر فمش لازم اكون في الاشراف اشوف حاجة تانية خصوصا ان البنات اللي اتقدموا للجنة الفنية كتير وانا مبحبش كدا مبحبش كدااااااااااااااااا
خلاص هدي اعصابك
ماشي
ام هند اللي هي اخت المهم اشتركت في اللجنة الرياضية كنت انا وبنوتة اسمها سارة من البانيا وبنوتة تانية اسمها ايمان من مصر اتفقنا مع سارة انها تكون البيج بوس وتقعد هي في اجتماع المشرفات واحنا هنساعدها ولما تخلص تبلغنا هنعمل ايه زي كل اللجان التانية
المهم الست سارة ربنا يكرمها لا حس ولا خبر
وهرجع للحتة دي تاني لما اجي احكي عن بكرة
بعد الهيصة ووجع الدماغ ده انا بقى كنت جبت اخري خلااااااص
خلصنا المحاضرة وبعدين انطلقنا كل الى سريييييييييره بعض البنات سهروا شوية لانهم ناموا لما وصلنا شوية لكن انا مانمتش وكعادتي زي النحلة خليتني طالعة نازلة ورايحة وجاية فجيت على الاخر واتهدييييييييييت قعدت معاهم شوية كدا وبعدين خلعت

بس بما اني خلعت منهم فانا هخلع منكم دلوقتي عشان كفاية عليكو كدا ويومين كدا باذن الله وهكمل
ااااااااه امال انتوا فاكرين ايه الموضوع كبييييييييييييييير واختكم رغاية وبتحكي بذمة فاستحملوا بقى.


ان شاء الله الايام القادمة هبدا اتكلم عن المحاضرات فباذن الله هجهز المحاضرات على ملفات وورد وارفعهالكم وانزل مع كل يوم في الاحداث المحاضرة بتاعته
أي خدمة بعيشكم الاحداث لحظة بلحظة اهو

*_*

وعشان العيشة تكمل شوفوا شوية الصور دول بس من غير قررر الله يكرمكم

طبعا مش محتاجين اقول ان دول شوية بنات ماشيين

دي صورة لجزءمن الممرات الرئيسية في القرية
يعني لو نزلت من الشاشة ووقفت في النص
لو مشيت شمال تروح عالبحر
يميم عالمطعم وقاعة المحاضرات
ورا بقى تطلع تقف جبني في مبنى الغرف
D:


ده ايه يا ولاااااااااد

بسيين يا ابلة

شطااااااار

وده ايه بقى؟؟؟
كمان بسيين يا ابلة
>> هُبل زي ابلتكو تمام



هنا خلف الاشجار والنخل والزرع وكدا
مبنى المطعم وقاعة المحاضرات


دي اكتر صورة داخلة دماغي الصراحة
يااااااه لو مكنش الجو برد اياميها
كنت ...

دي بلكونة بطول قاعة المحاضرات والمطعم
يعني اللي جعان يكسر الازاز على ايده اليمين وينط

القش ده تحته الكفتيريا
اللي طبعا طبعا مهوبناش ناحيتها لان شكلها لوحده شبهة

لا مفيش هنا لا ولاد ولا ابلة

هو بسين وخلاص
هي صورة بقى

في المطعم عالفطار

اللي قاعدة على راس الطاولة من هنااااك اسمها ارزاق

واللي قاعدة على راسها من هنا ومدياني ضهرها ومش فاضيالي دي فرح

واللي لابسة اشرب اخضر اسمها مُسفرة

وانا قاعدة في المطعم خدت الصورة دي

صورة كمان لنفس الممرات

كفاية عليكو دول في اليوم الاول

بقيت الصور مع الاحداث الخاصة بيها باذن الله

سلاااااااااااااام