ملتقى الفتيات الخامس .. 3 .. بدء الفعاليات

ورجعنالكم مرة تانية أعزائي المشاهدين
في الجزء التالت من ... ملتقى الفتيات الخامس

عشان ما نرغيش كتير في المقدمات .. في جزئين أول وتاني يقوموا بالواجب.

................

طيب كنا وصلنا لغاية فين .. لغاية فين .. اللهم صلي عليك يا نبي (عليه الصلاة والسلام) .. آآآآآآآه كنا خلصنا اليوم الأول وأنا طلعت على أوضتي أنام.
وبعديييييييين ؟؟؟
صحيت
لا ياشيخة؟!
شفتو بقى سبحان الله
كان المفروض نصحى الساعة 4 عشان القيام لغاية الفجر بعدين بعد الفجر والاذكار نلعب رياضة .. دا ايه يا شاطرين .. المفروض يا ابلة .. ماشي
أختكم بقى بدأتها بداية سيئة للغاية .. بما إني كنت تعبانة قلت لداليا (مشرفتي) صحيني على الفجر علطول عشان مش هقدر اصحى من 4 كدا هفستك منكم
أختنا داليا بقى صحيتني الساعة كااااااااااااام
حزروا فزروا
صحتني الساعة 6 ونص
يعني لا قيام ولا فجر ولا اذكار ولا حتى رياضة كان إحساس بدييييييييييع ما اوصفلكوش .. كان هاين عليا اقولها انتي لو واحدة من اخواتي في البيت كنت كلتك .. بس انا سامحتها لما لقيتها حاسة بيا وبتقولي بكل براءة .. أنا قلت انك تعبانة فأسيبك تصلي في الاوضة وتكملي نوم لغاية معاد الفطار احسن !!!
قلتلها طب كويس انها ما وصلتش لمعاد الفطار اللي هو الساعة 8 حضراتكم
طبعا انا بقى قلت لازم اعوض التقصير الشنيع الفظيع المريع ده وانزل جري عشان الحق اعمل حاجة مع مشرفة اللجنة الرياضية فااكرينها ؟؟ أيووووووون سارا اللي لا حس ولا خبر
أهو جه دورها أهو .. طبعا سوسو ما قالتش حاجة لحد ونزلت وقفت هي مع البنات ، هي وشوية بنات اندونيسيات ولما سالتها مقولتليش ليه اساعدك .. قالتلي والله احنا خلصنا متاخر خالص امبارح ومرضيتش اصحيكي
ياحوووونينة ياختي .. ايه يا عيال الحنية اللي نزلت عليكم كلكم مش راضيين تصحوني بسببها دي.
المهم نزلت لقيت دايرة بنات كبيييييييييييرة واقفين بيعملوا حركات غريبة وبيضحكوا على نفسهم رحت وقفت جنب شوشو بقولها بتعملوا ايه ؟؟! قامت ضاحكة ضحكتها العسولة اللي بتضحكها لما تكون ماسكة نفسها بالعافية وقايلة .. المفروض يعني اننا بنلعب رياضة
كان في بنت اندونيسية اسمها إيني كانت بتعمل تمرين للكتف اللي هو تقلب ايدك لورا وتمسكها من ورا ضهرك بالإيد التانية وتثبت على كدا .. طبعا طبعا .. نااااااااااااااااااااااادر جدا اللي ايديهم لمست بعض اصلا
كان شكلنا يكسف بصراحة .. هنا بقى مع ان الموقف يضحك جددددا بس انا من جوايا زعلت .. زعلت اوي
فين المؤمن القوي .. فين ان لبدنك عليك حقا وللا هي في الراحة بس فين اصلا الجدية من البداية .. البنات كانوا بيتعاملوا مع الموضوع انه تسلية بقى وحاجة جديدة ومشي حالك (طبعا مش الكل انا بتكلم دائما بشكل عام على الاغلبية ) .. المهم قعدت اعمل معاهم شوية كدا وانا مش مقتنعة باللي بيحصل خالص .. لقيتهم خلصوا وافرنقعوا في ارض الله الواسعة
وكان فاضل حوالي ساعة وربع لسه على موعد الفطار
قلت وبعدين بقى هو انا كدا عملت رياضة ما بدهاش انا هشتغل لوحدي من اول وجديد
جيت وقفت وبدات العب لقيت جهاد لسه نازلة زي الهانم من فوق بتقولي ايه ده انتي بتعملي لوحدك قلتلها لا سعادتك هما خلصوا من زمان .. قالتلي طيب انا هعمل معاكي قلتلها يا سلام بس كدا انضمي الى الصف
لعبت معايا تمرينين ولقيت صوتها بدا يعلا وشوية وهتشوطني باللي في رجلها ... في ايه حرام عليكي انت بتعذبيني ولا بتلعبيني رياضة .. وانا اقنع فيها يابنتي يهديكِ يرضيكِ انتي بس عشان مش متعودة .. المهم خلصنا وقلتلها هجري بقى شوية في الجو الحلو ده قصدي التلج ده عشان ادفى .. قالتلي لا بقى انتي بتستهبلي هو لسه فيها جري انا رايحة اقعد مع العيال
وسابتني اجري لوحدي

:(
في اثناء وانا بلعب معاها حطت مفتاح الاوضة جنبها وقالتلي فكريني اخده لما نخلص
طبببببببببببعا اكتر واحد هيعرف انا عملت ايه لما يقرا .. هو بابا لانه دايما يقولي يا مسطولة
D:
عرفتو؟؟ تمام ولا كانها قالتلي حاجة انا رحت اجري وهي راحت قعدت
خلصت جري وكان فاضل حوالي نص ساعة وشوية كدا
رحت اقعد معاهم مانا انهديت خلاص
قعدت بنت مش عارفة اندونيسية ولا ماليزية تكلمنا شوية عن رحلتها الى مصر وايه اللي بتحبه في مصر وايه اللي مش بتحبه المهم اتكسفنا شوية وبعدين قمنا .. لقيت جوجو هانم بتقولي ايه ده انا نسيت المفتاح .. وندور ما ندور المفتاح .. بحححححححححححح .. فص ملح وداب .. طبعا اعصابها تعبت وانا كعادتي اللي اكتسبتها مؤخرا (البرود) قعدت اهديها واقولها تقول الدعاء وباذن الله هنلاقيه في الاخر الحمد لله لقيناه مع تسنيم واتحلت اول مشكلة حصلت .
طلعت غيرت هدومي وغسلت وشي وكدا مكان اللعب والجري وبعدين نزلت عشان الفطار
الفطار بقى .. اتفرجوا
هو اينعم كان عينات بس تقريبا انا الوحيدة اللي كنت مبسوطة بيه .. عشان مااما ماكانتش هتقعد تقولي كلي كلي كلي كلي
كان عبارة عن 2 بيضة مسلوقة .. 2قطعة جبنة مثلثات .. شريحة جبنة رومي ايووووة شريحة أحيانا الشريحة دي كانت بتتغير تبقى شريحتين لانشون .. وطبق فنجان كدا فيه شوية فول .. وساعات علبة مربى من اللي هي عينات دي .. مع عصير .. وشاي بعد الفطار
انا كنت باكل حتتين الجبنة المثلثات وشريحة الرومي وللا اللانشون واشرب العصير واقوم
وابقى كدا ميت فل وعشرة
اول يوم بقى كنت متحمممممممسة جدا للمحاضرة .. ومستنياها تبدأ بفارغ الصبر
خلص وقت الفطار وبدأنا ندخل القاعة واترص اترص ياورق الخس .. ميييييييييييين ده .. دكتور مثنى
لالالالالا محدش يصقف ولا يصفر ولا الكلام ده احنا ناس محترمين امال ايه
اعتلى دكتور مثنى هو و دكتور حمدي المنصة .. عشان تبقوا معايا بس المنصة دي ارتفاعا عن الارض حوالي 15 سم يعني لا اعتلى ولا بتاع .. هي خشبة محطوط عليها كرسيين وتربيزة D:
المهم
الدكتور حمدي قدم دكتور مثنى في عجالة ثم انسحب تاركا له المجال
وياعيني على المجال .. ما اقولكوش على المجال
ايه الراجل الدماغ ده .. بجد ربنا يحفظه .. كنت حاسة اني قاعدة متسلطنة اوي
كلمنا زي ما قلت في الجزء الاول عن (مشاركة المراة السياسية .. رؤية تأصيلية) بجد كانت محاضرة رائعة جدا
روعتها بالنسبة ليا على الاقل كانت لا تكمن بشكل اساسي في استفادة معلومات جديدة .. لا .. كانت استفادة تدعيمية لفكري .. بمعنى انه رتبلي ذهني ووضح حاجات كتير جدا واعطاني قواعد سليمة ومبادئ وردود واضحة في هذا الجانب.
بعد حوالي 3 ساعات من الحديث المااااااتع الشيق اللي خلانا بجد ما نحسش ان الوقت عدى .. خدنا بريك لمدة نص ساعة كلنا فيه بسكوت وشربنا شاي
وبعدين رجعنا تاني عشان ورش العمل
يا سلااااااااااام امتع حاجة ورش العمل دي
فعلا هي مقياس احنا فهمنا او استفدنا حاجة من المحاضرة ولا لا
المهم اتقسمنا مجموعات كل مجموعة كان عليها عمل عصف ذهني للعقبات والفرص امام المراة المسلمة الخاصة بكل مراتب العمل السياسي اللي لخصت في اربعة هي :
1- الراي العام
2- جماعات الضغط
3- الاحزاب السياسية
4- المناصب الحكومية العليا من البرلمان حتى الرئاسة
وبعدين نطرح حلول للمشاكل واقتراحات تطويرية
بعد حوالي نصف ساعة او يزيد انتهى الوقت المحدد لكل مجموعة ورجعنا اماكنا وطرحت كل مجموعة نتائجها
كان في تشابه كبير .. بس كمان كان في نقاط اختلاف
والدكتور مثنى اثنى على التشابه ده قائلا .. انه ليس عيبا ولكنه دليل مفرح على توافق افكارنا وهذا عامل كبير وخطوة كبيرة نحو الحل ان شاء الله
اه والله وانا كمان عملت زيكو كدا وابتسمت كدا بردو .. مش بقولكم راجل دماغ
ربنا يحفظه ويزيده من فضله وينفع به الاسلام والمسلمين
خلص وقت المحاضرة وجه وقت الغدا وكان الدكتور مثنى لسه عايز يكمل جزء من المحاضرة
فقال هاجله لمحاضرة بالليل باذن الله
ما تخافوش مش هاكل المحاضرة عليكم .. أنا كتبت نصها وبقالي يومين مش عارفة اخلصها وده اللي اخرني في تنزيل البوست

هحاول باذن الله اخلصها النهاردة وأرفعها واحطلكم اللينك.
بس ابقوا ادعولي .. مش انا اكتب ده كله وصوابعي تتفحت مرتين مرة هناك بالقلم ومرة هنا عالكيبورد وفي الاخر ما تدعوليش .. ماشي .. انا بقول اهو
.............
اتغدينا الحمد لله و كان المفروض من بعد الغدا لغاية الساعة 6 فترة حرة
طبعا مكنتش حرة خالص لاني قعدت فيها مع البنات نتفق ونتدرب على اللي هنعمله في حفلة السمر باليل
المهم اتفقنا اني هقول نشيد استيقظي يا امتي ونشيد لا تحزن وقعدت مع ألوء عشان هي اللي بتعرف تضرب دف نتدرب .. خلصنا تدريب واتسنكحنا شوية في القرية .. الجو في الوقت ده ومنظر الخضرة مع البحر والشمس كان يهبل بجد .. سبحان الله.
حصل موقف لذيذ اوي بقى
القرية المفروض لاننا في الشتا مفيهاش ناس غيرنا .. بس كان في كام اسرة متنتورين كدا
المهم وانا والوء قاعدين في الجنينة خدتنا الجلالة وقعدنا نقول كذا نشيد ورا بعض وشوية ولقيت عيال صغيرين عمالين يتلموا حوالينا ويتفرجو ومتنحين تتنيحة .. في ايه يا عيال احنا بدعة ولا ايه؟؟؟
المهم في بنت كبيرة شوية جت لقيتها بتقرب علينا قلت هتلمهم وتمشي .. جت وقفت معاهم وبعد ما خلصت النشيد اللي كنت بقوله رايحة اتعرف عالعيال العساسيل دي واسلم عليهم تقريبا البت خافت لحسن اضربهم ولا ايه لقيتها بتقولي معلش والله بس اللي بتقولوه ده جميل اوي وصوتك ماشاء الله حلو فحبينا نسمع معلش اذا كنا ضايقناكم
قلتلها لا عادي يابنتي مفيهاش حاجة واستغليتها فرصة وقعدنا اتعرفنا عالعيال شوية
هنا بقى مع ان منظري مكنش لطيف ابدا وانا واقفة في النص والناس بتتفرج عليا كدا بس بجد كان كل ما حد يقرب احس بفخر اوي وبعزة اوي واحس بكلمات النشيد اكتر واكتر .. كان بيبقى هاين عليا اوقف النشيد واقول يااااااااااااااااااااااااااارب اهو يارب مش بنعصيك وبنعمل حلال وبنقرب الناس منك بفن صح وجمال صح
احساس ممتع اننا نوصل الفن الاسلامي للناس اللي متعرفش عنه حاجة خالص دي
فعلا احنا في نعمة كبيرة اوي .. نعمة الفهم .. نعمة اليسر .. نعمة .. حلاوة الحلال .. ورقي اهتمامتنا ده في حد ذاته نعمة
خلصنا لف وصلينا المغرب ومش عارفة ايه ورجعنا قاعة المحاضرات عشان المحاضرة التانية
كان مفروض اصلا المحاضرة دي اللي تديها الفنانة امية جحا .. ولكن كما اوردنا انها اعتذرت بسبب سفرها لما تم فتح المعبر
فدكتور مثنى خد المحاضرة عشان يكمل ما بدا صباحا وبالفعل اكمل المحاضرة وزادنا متعة الى متعة
ادعوا للراجل ده كتير بالله عليكو لانه يستاهل بجد
ربنا ينفعه وينفع بيه
المهم .. جه وقت وجبة العشاء .. وكانت فيها شبه من الفطار بس مكنش في فول كان في بداله زبادي
كانوا بيقدمو مع الزبادي سكر .. وانا باكله من غير سكر فكان العيال بيستغلوا الموقف وياخدو السكر بتاعي
اهئ اهئ
>>> طلعتهم اشرار هههههههه لا بجد انا اللي كنت بديه لهم لحسن يقولو عيني فيه ولا حاجة
جه وقت حفلة السمر
كل بلد قدمت فقرة صغنتوتة كدا واحنا كالعادة خدنا فقرتنا في الاخر عشان يبقى الوقت معانا عملنا اسكتش جميل عن تخلي الامة عن دينها وتفضيل البعض للمصالح الشخصية على مصالح الامة بعده قلت نشيد استيقظي يا امتي
وبعدين قلت لا تحزن وانا مسكت الميك من هنا وكل واحدة تقولي نشيد .. وخلوني اعيد النشيدين دول كذا مرة
ام هند
بعد ما الحفلة خلصت ولقيت الناس هتقوم استغليت اني ماسكة الميك وقلتلهم لا استنوا شوية اقعدوا
كلهم قعدوا وبصولي كدا .. قالوا البت اتهبلت ولا ايه
بس الحمد لله طلعت ما اتهبلتش .. وكان هدفي استغلال افرصة اني اكلم الكمممممم ده من البنات على حملة عائدون والحمد لله الحمد لله لقيت اقبال وتفاعل رهيييييييييييب من البنات وحماسة مكنتش اتخيلها
بجد فرحت بيهم اوي ..

فاصل ...
بمناسبة حملة عائدون الحملة ما نامتش ولا حاجة باذن الله انا بس منشغلة في شوية ظروف كدا في البيت تخلص ونعود بقوة باذن الله .. اتفقت مع كذا بنت انهم يكونو معانا في فريق يحمل الحملة دي مش مجرد عالنت بس لا بين الناس في الشارع لان ده الهدف الرئيسي منها فياريت يا اخواني واخواتي اللي عنده استعداد يكون معانا ضمن الفريق ده يضيف ايميلي ويخليه على اتصال بيا الله يكرمكم ويتقبل منكم يارب.
نرجع تاني للمعسكر ..
خلصت كلام عن فلسطين مع البنات والحفلة خلصت
وافرنقعنا بردو بس الى مبنى الغرف بقى .. المرة دي ما نمتش علطول .. غيرت هدومي ونزلت لشوشو في اوضتها هي والبناتيت اللي معاها وقمنا طالعين من اوضتهم على الاوضة اللي جنبهم اللي كان فيها دكتورة صباح السكككككككككرة .. هكلمكم عنها بعدين لوحدها ان شاء الله وقعدنا نتكلم ونضحك ونهزر اتفحتنا ضحك ليلتها وكان في بنات ماليزيات معاهم قعدوا يهزروا معانا ويقولولنا اناشيد بلغتهم وبعدين جت واحدة منهم قالت استنوا هقولكم قران .. وقرات سورة ق .. يا الله على الروعة .. نبرة الصدق في صوتها مع حروف اللغة العربية وملامح وشها هي اصلا وهي بتقرا .. مع سورة ق وما ادراكم ما سورة ق
كان جو رائع .. لا تملك فيه الا ان تحمد الله على نعمة الاسلام والقران واللسان العربي
خلصنا صهللة والنوم كبس علينا
فقمنا تفركشنا كل الى موقعه ونمنااااااااااااااااااا في انتظار يوم جديد ..
انتظروني البوست الجاي


سلاااااااااااااااااااااام
.................

معلش بقى مفيش صور المرة دي

هحاول اخلص المحاضرة النهاردة وانزل اللينك

.............................

*تحديث*

شوفو .. المحاضرة دي كانت الوحيدة اللي طبعوهالنا من جهاز الدكتور مثنى ووزعوها علينا

بس وزعوها بعد مانا كتبتها وراه

فانا احترت انزلكم اللي كتبتها وراه ولا بتاعته الأصلية اللي هو كاتبها

واستقريت في الآخر على الكلمة اللي بتقول

(عالأصل دور) >>> هو إعلان ايه ده بالمناسبة

المهم

اللينك أهو اللي عايز يحملها

مشاركة المراة السياسية .. رؤية تأصيلية

وما تنسوش الدعااااااااااااااااااااء