الخميس، يونيو 21، 2007

بوست متأخر جدددددا........أجمل هدية

السلااااااااااااام عليكم ورحمة الله وبركاته
.
.
البوست ده المفروض إنه كان ينزل يوم الخميس الموافق 14/6
ليه يا ترى؟؟
لأن المناسبة اللي كنت عايزة أكتب عشانها البوست كانت في اليوم ده
صحيح انا خلصت امتحانات يومها
بس مش هي دي المناسبة بردو
أمال إيه يا ست الحجة
!!
حزروا فزروا
!!
قولي يا رخمة
..
حاضر
..
مابجيش الا بالعين الحمرا
..
المهم
المناسبة إني أخييييييييييييييرا
هبطل أعيش عالة على ممتلكي كتب الرافعي
؟؟
ليا أخت ربنا يكرمها ويسعدها ويحفظها ياااااااااااااارب
عارفة إني بعشق الرافعي
وكل ما أخرج معاها ونعدي على مكتبة اسال على كتب ليه ومش الاقي
:(
فلقيتها جاية يوم الخميس الصبح
قبل ما يوزعوا الورق في اللجنة
وبتقولي
ليكي عندي مفاجأة
إيه؟
أقولك دلوقتي ولا بعد الامتحان
قلتلها قولي دلوقتي عشان هقعد طول الامتحان افكر في المفاجأة ومش هجاوب
:D
لقيتها قامت مطلعالي هدية شكلها كده علبة برفان بس على كبير شوية
قلتلها ايه ده
قالتلي
كتاب
؟؟
وحي القلم
هه
وحي القلم للرافعي
هه
التلات أجزاء
هه
أنا تنحت شوية كمان
وبعدين قمت قايمة واخداها بالحضن
وجزاااااااااااكم الله خيرا ربنا يخليكي وووووو
واللجنة كلها بتقول
(دي عبيطة دي ولا ايه؟)
>>> كالعادة يعني
ولسه هتكلم وأسأل
لقيتها بتقولي أيوووة جبته من مكتبة (كذا) وهناك هتلاقي بقية كتب الرافعي
بجد بجد كنت عايزة ابوس ايدها
ربنا يحفظك يا سوسو ويخليكي ليا وما يحرمنيش من مفاجاتك أبدا أبدا
......................
طبعا أنا مش حاطة البوست ده رخامة
لا انا حاطاه على سبيل محاولة رد الاحسان
لأختي الحبيبة (سارة) وهتعرفو كتبت اسمها ليه
لأن انتوا اللي هتردولها الاحسان معايا
هع هع هع
ايووووووووون فهمتوا
كل من يدخل إلى المدونة ويقرأ هذا البوست
أسأله الدعاء لاختي الحبيبة سارة
إن ربنا يرزقها مما تتمنى وفوق ما تتمنى
بس كده
وجزااااااااااكم الله خيرا كثيرا
نخدمكم في الأفراح إن شاء الله
.
.
----------------
على الهامش
إن شاء الله أوعدكم إني أبطل إهمال
والبوست الجاي هيكون جامد بإذن الله
والسلاااااااام عليكم

هناك 14 تعليقًا:

mo'men mohamed يقول...

ربنا يكرمها و يكرمك نت كمان
جزاك الله كل خير
بس من الواضح انك بتحبى الرافعى قوى
انا بصراحه مجربتش اقراله
بس أحاول

غير معرف يقول...

بسم الله، الحمد لله ، والصلاة والسلام على رسول الله
السلام عليكم
لسه لحد دلوقتي مقرتيش وحي القلم.. أمال لو قرتيه هتعملي فينا ايه ..ده انت هتأدبينا أدب عالي قوي قوي..
الصراحه أنا عندي وحي القلم ..لكني أجد أسلوبه عاليا جدا.. ربما أميل إلى المنفلوطي لأنه في رأيي اسلس عبارة وأعذب لفظا
عموما بارك الله لك ونحن في انتظار لمزيد من انتاجكم البهي

والسلاااااااااااااام

غير معرف يقول...

آه نسيت أن أدعو لسارة.
بارك الله لك فيها
وفي الصداقة التي تجمعك بها

غير معرف يقول...

جميل ما كتبت

لكن خليكي أحسن بالعربية ما امكن

لامانع من بعض العامية
لكن لا ننسى لغتنا الاصلية

Alaa يقول...

الكتاب ده عندنا من و أنا عندي تلات سنين :)~
بس بدأت أقرأه و أنا في تانية ثانوي
كان سبب أساسي في إثراء ثقافتي و اهتمامي بالقراءة بشكل عام
حسيت انها عالم تاني ممكن الواحد يعيشه بعيد عن العالم بتاعه

ألف مبروك :)
و ربنا يوفق صاحبتك و يحفظها

Alaa يقول...

نسيت أقولك كمان ان عندنا
حديث القمر
و برده رسائل الأحزان و السحاب الأحمر و أوراق الورد و دي كانت سلسلة كتبها الرافعي

يعني ناقصلي في المكتبة كام كتاب و أكمل مجموعة الرافعي
و على فكرة في رسايل من بتاعة الرافعي في مجلة الرسالة متنشرتش في وحي القلم باحاول أجمعها برده

تحياتي

غير معرف يقول...

ألف مبروك الكتاب أختنا
فعلا هو كتاب قيم يستاهل القراءة
مع اني حبيت أوراق الورد أكتر منه
ونفسي ألاقي كتاب السحاب الأحمر
بس مش موجود عندنا

عموما
الله يبارك فيها أختنا اللي خلتك تبطلي عالة على الناس
وربنا يكرمها
وييسرلك تقتني كل كتب الرافعي
وان شاء الله نشوفك أديبة أشطر منه

جهاد خالد يقول...

الاخ الفاضل .. نسر الشرق
جزانا واياكم
فعلا أنا بحب الرافعي جدا
حاول تقرأله فعلا هتستفيد كتير



اخي الكريم .. ابراهيم
أكرمك الله
أنا قرأت للرافعي كتير قبل كده
بس وحي القلم لسه أهو ربنا يسهل
وفعلا صدقت أسلوب الرافعي عالي جدا
وفي حاجات كتير لازم أقرأها كذا مرة واتخذ كذا وضع وامخمخ فيها كده عشان افهمها
اما المنفلوطي بقى فعلا اللي ما قراتلهوش
ياريت لو عند حضرتك لينك لحاجة اليكترونية ليه تبعتهولي عشان اطلع على اسلوبه
جزاكم الله خيرا على التشجيع
وعليكم السلام والرحمة

جهاد خالد يقول...

أخي الكريم .. أبو مالك
جزاكم الله خيرا على التذكير
بس انا ما نسيتش :D
وهتشوف حضرتك البوست الجاي بإذن الله
انا بس بعتبر البوست ده زي مذكرات عالماشي كده

جزاكم الله خيرا مرة تانية

جهاد خالد يقول...

أخي .. علاء
فعلا القراءة وخاااااااصة للرافعي
تشعر الانسان انه في ملكوت اخر
فاسبح وأسبح مع فلسفته وتشبيهاته الرائعة

ايه الحكاية كلكو بقيتو تنسوا ليه
المهم
انا قراتله السحاب الاحمر ورسائل الاحزان
وأوراق الورد ده معايا منه نسخة صغيرة علطوووول في شنطتي
بس حديث القمر ما قرأتوش
وان شاء الله عرفت المكتبة بقى
هبيت هناك واجيب اللي انا عايزاه

جزاكم الله خيرا

جهاد خالد يقول...

اخي بهاء
فعلا انا قرات كام مقال كده ..الكتاب قيم بشكل فظيع
وبالنسبة لاوراق الورد
فده ابداع الرقة عندما تنساب من قلم كقلم الرافعي
بس انا شايفة انه غلط المقارنة بينهم لان اوراق الورد بيتناول موضوع واحد وخاص بفلسفه معينة
لكن وحي القلم متنوع ومتناول بشكل تاني

المهم ان الاتنين حلوين

وعن السحاب الاحمر انا قراته بس لسه ما اشتريتهوش
وباذن الله لو يسر لي ربي شراؤه
هحاول هحاول مش وعد
ابقى اسحبه سكانر وابعته لحضرتك
بس افتكر انا قلت هحاااااااول

وجزاكم الله خيرا

غير معرف يقول...

أختي جهاد
أنا ما عملت مقارنة بين الكتابين في المواضيع
لكن أوراق الورد له وقع خاص
وكلماته رقيقة جدا
وبتدخل القلب بسرعة
بالنسبة لكتاب وحي القلم
في بعض الكتابات المعقدة
اللي صعب فهمها بسهولة

أما بالنسبة للسحاب الأحمر
فشكرا للمبادرة الطيبة
ويا ريت تخلي محاولتك جادة
مش بس رفع عتب يعني :D

جهاد خالد يقول...

أخي .. بهاء
إن شاء الله لا تقلق
بس ارجع مصر وأشتري الكتاب
وأبدا في الفكرة علطول
دعواتكم ربي ييسر

غير معرف يقول...

أختي الكريمة
أنا بمزح والله
ربنا يبارك فيكي ويكرمك
ويرجعك بلدك بالسلامة يا رب
تحياتي